Training Center for Business Development

​

   ລະບຽບ

ວ່າດ້ວຍການໃຊ້ຫໍສະໝຸດ

1. ສ້າງສູນສະໜອງຂໍ້ມູນຂ່າວສານ ຜ່ານຫໍສະໝຸດຄົ້ນຄ້ວາ ທີ່ປະກອບມີປຶ້ມຕໍາລາວິຊາການ, ບົດວິໄຈ, ເອກະສານ ແລະ ວາລະສານຄົ້ນຄ້ວາຕ່າງໆ ທີ່ມີຫຼາຍກ່ວາ 5000 ກວ່າຫົວ ທັງສະໜອງປຶ້ມຕໍາລາອີເລັກໂທຼນິກຫຼາຍກ່ວາ 5 ພັນຫົວ ທີ່ຕອບສະໜອງຕໍ່ຄວາມຕ້ອງການຍົກລະດັບຄວາມຮູ້ໃນທ່າມກາງສິ່ງແວດລ້ອມທີ່ສະດວກ ແລະ ທັນສະໄໝ ຜ່ານການລົງເລິກອ່ານເນື້ອໃນເອກະສານ, ປຶ້ມຕໍາລາວິຊາການເພື່ອຍາດແຍ່ງເອົາຄວາມຮູ້ທີ່ໃໝ່ອ່ຽມ, ຮຽນຮູ້ເຕັກນິກການຂີດຂຽນ, ການວິເຄາະ, ລົງເລິກອ່ານເນື້ອໃນ ບົນພື້ນຖານຂໍ້ແນະນໍາໃນປຶ້ມຄູ່ມື ທີ່ຮຽບຮຽງໂດຍບັນດານັກປາດ, ສາດສະດາຈານ ແລະ ນັກວິທະຍາກອນທີ່ລືຊື່ຂອງພາກພື້ນ ແລະ ຂອງໂລກ;

2. ເປັນບ່ອນສະໜອງແຫຼ່ງຂໍ້ມູນຂ່າວສານ ໃນຫໍສະໝຸດຄົ້ນຄ້ວາ[1]ໃຫ້ແກ່ນັກສຶກ ສາຂັ້ນປະລິນຍາໂທ ແລະ ປະລິນຍາເອກ, ຕະຫຼອດເຖິງບັນດາອາຈານ, ຜູ້ປະກອບອາຊີບອິດ ສະຫຼະດ້ານທີ່ປຶກສາທຸລະກິດ, ນັກບັນຊີ, ນັກກວດສອບ, ນັກຄຸ້ມຄອງ, ນັກທຸລະກິດ ມີໂອກາດໄດ້ສຶກສາ​ເພີ່ມ​ຕື່ມ ກ່ຽວ​ກັບ ປຶ້ມຕໍາລາ, ເອກະສານຄົ້ນຄ້ວາຕ່າງໆ ເພື່ອເປັນບ່ອນອີງໃຫ້ຮຽບຮຽງປຶ້ມຕໍາລາ, ຄົ້ນຄ້ວາ, ແຕ່ງບົດສອນ ແລະ ບົດປະຖະກະຖາ, ທັງບົດຮຽນຂອງສ.ປ.ປ.ລາວ, ຂອງພາກພື້ນ ແລະ ສາກົນ;

3. ຄົ້ນຄ້ວາ, ຮຽບຮຽງ, ແຕ່ງປຶ້ມຕໍາລາ, ປຶ້ມຄູ່ມືວິຊາການ ແລະ ເອກະສານຝຶກອົບຮົມ ເພື່ອຕອບສະໜອງຄວາມຕ້ອງການດ້ານການສຶກສາສາຍວິຊາຊີບຂະແໜງການທຸລະກິດຕ່າງໆ ກໍຄືການສຶກສາ ຊັ້ນສູງ, ມະຫາວິທະຍາໄລ ແລະ ເໜືອວິທະຍາໄລ ຕາມ​ໂມ​ດູ​ນວິຊາ​ຮຽນ ທີ່​ກະຊວງ​ສຶກສາ​ໄດ້​ຮັບຮອງ​ເອົາ ແລະ ຈໍາໜ່າຍເພື່ອຮັບໃຊ້ການຄົ້ນຄ້ວາຮໍ່າຮຽນຂອງນັກສຶກສາ, ການສິດສອນຂອງຄູອາຈານ, ແລະ ການສຶກສາເພີ່ມຕື່ມສໍາລັບນັກຝຶກອົບຮົມຂະແໜງການຕ່າງໆ;

 

ສະນັ້ນເພື່ອເປັນການປົກປັກຮັກສາປື້ມຕຳລາ, ອຸປະກອນເຄື່ອງໃຊ້ສ່ວນລວມໃຫ້ຄຸ້ມຄ່າ, ແລະຍາວນານຮອດລຸ້ນຕໍ່ໆໄປ ທາງສູນ ສພທ ຈິງໄດ້ວາງລະບຽບຕ່າງໆອອກມາເພື່ອໃຫ້ຜູ້ຊົມໃຊ້ບໍລິການໄດ້ປະຕິບັດຕາມ ດັ່ງນີ້:

ມາດຕາ 1. ວ່າດ້ວຍການເປັນສະມາຊິກ.

          ພະນັກງານ, ນັກສຶກສາ ແລະ ຜູ້ທີ່ຕ້ອງການຢາກເປັນສະມາຊິກຂອງຫໍສະໝຸດຕ້ອງປະກອບມີເອກະສານດັ່ງນີ້:

• ປະກອບຄຳຮ້ອງຂໍເຂົ້າເປັນສະມາຊິກ 1 ຊຸດ (ເອົາຢູ່ຫໍສະໝຸດ)

• ກອບປີ້ ບັດປະຈຳຕົວ ຫຼື ບັດພະນັກງານອື່ນໆ

• ຮູບ ຂະໜາດ 2x3 : 2 ໃບ

• ຄ່າທຳນຽມດັ່ງທີ່ໄດ້ລະບຸໄວ້ໃນມາດຈາ 3 ຂອງກົດລະບຽບສະບັບນີ້

• ບັດສະມາຊິກດັ່ງກ່າວໃຊ້ໄດ້ນັບແຕ່ມື້ລົງລາຍເຊັນເປັນຕົ້ນໄປ ຈົນຄົບ 1 ປີ ເທົ່ານັ້ນ

• ກໍລະນີບັດເສຍ, ຈີກຂາດ, ບໍສາມາດລະບຸໄດ້ ໃຫ້ນຳເອົາບັດດັ່ງກ່າວມາສະເໜີຕໍ່ພະນັກງານຫໍສະໝຸດ ເພື່ອຈະປ່ຽນບັດໃໝ່ໃຫ້ ແລະ ຕ້ອງໄດ້ເສຍຄ້່ທຳນຽມເພີ່ມ

ມາດຕາ 2. ວ່າດ້ວຍຜູ້ມີສິດໃຊ້ ຫໍສະໝຸດ

• ຜູ້ທີ່ຖືບັດເປັນສະມາຊິກ ຫໍສະໝຸດ ສພທ ເຊັ່ນ: ອາຈານ, ພະນັກງານ, ທຸກທ່ານທີ່ມີບັດສະມາຊິກ ຂອງປີ 1 ເທົ່ານັ້ນ

• ສ່ວນຜູ້ທີ່ບໍ່ມີບັດສະມາຊິກ ຖ້າຈະໃຊ້ບໍລິການກໍ່ຕ້ອງເສຍຄ່າບໍລິການເປັນລາຍຄັ້ງ ໃຫ້ກັບຫໍສະໝຸດຄັ້ງລະ 5000 ກີບ/ຄັ້ງ ແຕ່ບໍ່ສາມາດຢືມປື້ມອອກຈາກຫໍສະມຸດໄດ້

ມາດຕາ 3. ຄ່າທຳນຽມບັດຫໍສະໝຸດ

• ສະມາຊິກ ຕ້ອງຈ່າຍຄ່າທຳນຽມ 100000 ກີບ / ປີ (ເຮັດບັດໃໝ່ + ໃບຄຳຮ້ອງ)

ມາດຕາ 4. ຜູ້ທີ່ມີສິດຢືມປື້ມອອກໄດ້.

• ແມ່ນຜູ້ທີ່ຖືບັດເປັນສະມາຊິກຂອງຫໍສະໝຸດ ປະຈຳ 1 ປີ ເທົ່ານັ້ນ ແລະ ຕ້ອງມີການຕໍ່ອາຍຸກ່ອນ ຖ້າບັດໝົດອາຍຸຈຶ່ງຈະສາມາດຢືມປື້ມອອກໄດ້

ມາດຕາ 5. ວ່າດ້ວຍການຢືມ - ການສົ່ງປື້ມ

• ສຳລັບທານທີ່ມີບັດສະມາຊິກຫໍສະໝຸດ ສາມາດຢືມປື້ມໄດ້ຄັ້ງລະ 2 ເຫຼັ້ມຕໍ່ 5 ມື້ເທົ່ານັ້ນ

• ຕ້ອງສະແດງບັດສະມາຊິກທຸກຄັ້ງທີ່ມີການຢືມ - ການສົ່ງປື້ມ

• ກ່ອນວັນທີ່ບັດໝົດອາຍຸ 7 ວັນຕ້ອງສົ່ງປື້ມຄືນ ແລ້ວຕໍ່ບັດກ່ອນຈຶ່ງຢືມຕໍ່ອີກຄັ້ງໃໝ່ໄດ້

ມາດຕາ 6 ຂໍ້ຫ້າມ ແລະ ຂໍ້ແນະນຳໃນການຢືມ - ການສົ່ງ

• ຫ້າມເອົາບັດສະມາຊິກຄົນອື່ນມາຢືມ, ແຕ່ສາມາດມາສົ່ງແທນກັນໄດ້

• ຕ້ອງສົ່ງປື້ມ, ຕຳລາ ຕາມທີ່ໄດ້ແຈ້ງໄວ້ໃນບັດກຳນົດສົ່ງໃຫ້ຖືກຕ້ອງ

• ເມື່ອຮອດກຳນົດສົ່ງ ແຕ່ວຽກ ຫຼືຄວາມຕ້ອງການໃຊ້ປື້ມຍັງມີຢູ່ ຜູ້ຢືມມີສິດຕໍ່ເວລາໄດ້ອີກ ແຕ່ຕ້ອງນຳເອົາປື້ມນັ້ນ ມາສົ່ງແລ້ວຂໍຢືມໃໝ່, ຖ້າທ່ານບໍ່ນຳປື້ມດັ່ງກ່າວມາສະເໜີນຳພະນັກງານບໍລິການຖືວ່າຍັງບໍ່ທັນສົ່ງ ແລະ ຖ້າກາຍກຳນົດຈະຖືກປັບໄໝ

ມາດຕາ 7. ວ່າດ້ວຍການຕໍ່ອາຍຸປື້ມ

• ປື້ມ, ​ຕຳລາຮຽນຕ່າງໆສາມາດຢືມຕໍ່ກັນໄດ້ພຽງ 2 ຄັ້ງ ຕິດຕໍ່ກັນ

• ແຕ່ຕ້ອງເອົາປື້ມມາສົ່ງຕາມທີ່ມື້ກຳນົດຢູ່ໃນບັນທຶກການຢຶມ -ການສົ່ງກ່ອນຈຶງສາມາດຢຶມຕໍ່ໄດ້ ສາມາດຢຶມຕໍ່ໄດ້ 1 ເທື່ອ (ຖ້າບໍ່ມີຜູ້ສັງຈອງປື້ມດັ່ງກ່າວ)

ມາດຕາ 8. ວ່າດ້ວຍປື້ມທີ່ບໍ່ອະນຸຍາດໃຫ້ຢືມອອກນອກຫໍສະໝຸດ

• ວິທະຍານິພົນ, ວາລະສານ ບົດລາຍງານ, ໜັງສືພິມ, ແລະ ປື້້ມອີກຈຳນວນໜຶ່ງ

ມາດຕາ 9 ວ່າດ້ວຍລະບຽບທົ່ວໄປສຳລັບຫ້ອງອ່ານ

• ຜູ້ທີ່ຈະເຂົ້າໃຊ້ຫໍສະໝູດ ຕ້ອງແຕ່ງກາຍສຸພາບ, ຮຽບຮ້ອຍ

• ຕ້ອງຝາກກະເປົາ, ກະເປົາໂນດບຸກ, ເສື້ອກັນລົມ, ກັນໜາວ, ເສື້ອຄຸມໃຫ້ແກ່ໄວໃນກະເປົາຂອງຕົນເອງ ເອົາໄວໃຫ້ຮຽບຮ້ອຍເສຍກ່ອນເອົາບັດນຳພະນັກງານທີ່ປະຕູເຂົ້າ, ຖ້າມີເງິນ ຫຼື ວັດຖຸມີຄ່າ ອື່ນໆຄວນຮັກສາ ແລະ ເກັບໄວ້ດ້ວຍຕົນເອງ

• ອະນຸຍາດໃຫ້ຖືສໍດຳ, ປາກກາ, ບິກ, ເຈ້ຍຂາວ ຫຼື ປື້ມຂຽນສຳລັບບັນທຶກ, ສ່ວນປື້ມຕຳລາ ຫຼືສິ່ງພິມອື່ນໆ ບໍ່ອະນຸຍາດໃຫ້ນຳເຂົ້າຫໍສະໝຸດເດັດຂາດ

• ຕ້ອງຮັກສາກົດລະບຽບໃນຫ້ອງອ່ານ, ການເວົ້າຈາຄວນສຸພາບ, ຫ້າມວົນແຊວອັນເປັນການລົບກວນສະມາທິຂອງຜູ້ອື່ນ.

• ຮັກສາປື້ມ ແລະເອກະສານຕ່າງໆບໍ່ໃຫ້ຈີກຂາດ, ເປ່ເພ, ເປິເປື້ອນ ແລະ ຕົກເຮ່ຍເສຍຫາຍ

• ຫ້າມຂີດຂຽນສິ່ງໃດໆໃສ່ປື້ມ ຫຼືໂຕ໊ະຕັ່ງ

• ຫ້າມສູບຢາໃນຫ້ອງອ່ານ

• ຫ້າມໃຊ້ຫ້ອງສະໝຸດເປັນບ່ອນພົບປະໂອ້ລົມ ຫຼື ເປັນບ່ອນນອນເດັດຂາດ

• ຫ້າມນຳເອົາອາຫານ, ເຂົ້າໜົມ ແລະ ເຄື່ອງດຶ່ມທຸກຊະນິດເຂົ້າໃນຫ້ອງອ່ານ

• ຫ້າມຍ້າຍໂຕ໊ະຕັ່ງຂາກບ່ອນທີ່ຈັດໄວ້ໃຫ້

• ກ່ອນອອກຈາກຫ້ອງອ່ານຕ້ອງເອົາປື້ມ ຫຼື ເອກະສານ ທີ່ຕົນເອງໃຊ້ຄົ້ນຄ້ວາໄປວາງໄວ້ໜ້າໂຕ໊ະທີ່ຈັດໄວ້ໃຫ້

ຫາກມີຂໍ້ຂັດຂ້ອງ ຫຼື ມີບັນຫາໃດໆກ່ຽວກັບການໃຊ້ຫໍສະໝຸດຕ້ອງປຶກສານຳພະນັກງານ

• ກໍລະນີມີການສົງໄສ, ຈະຖືກກວດຄົ້ນ ແລະຕັກເຕືອນຈາກພະນັກງານຫໍສະໝຸດ

ມາດຕາ 10 ວ່າດ້ວຍລະບຽບການປັບໄໝ

• ການສົ່ງປື້ມການກຳນົດຈະຖືກປັບໄໝຫົວລະ 1500/ 1 ວັນ ລວມທັງວັນເສົາ ແລະ ວັນອາທິດ, ຖ້າສົ່ງກາຍກຳນົດ 5 ຄັ້ງຈະຖືກສະຫຼະສິດ ຈາກການເປັນສະມາຊິກຫໍສະໝຸດ

• ກໍລະນີຢາກກ໊ອບປີ້ ເອົາເນື້ອໃນປື້ມ ຫຼື ເອກະສານ ແມ່ນສາມາດກ໊ອບປີ້ ໄດ້ຢູ່ໃນຫໍສະໝຸດຂອງພວກເຮົາບໍ່ອະນຸຍາດໃຫ້ເອົາໄປຂ້າງນອກ

• ບຸກຄົນທີ່ເຮັດປື້ມຈີກ, ຂາດ ຫຼື ເຮັດເສຍ ຕ້ອງໃຊ້ແທນດ້ວຍປື້ມແບບເດີມ, ຖ້າໃຊ້ແທນບໍ່ໄດ້ຈະຖືກປັບໄໝ 3 ເທົ່າຂອງລາຄາປື້ມເຫຼັ້ມນັ້ນ.

• ບຸກຄົນໃດລັກປື້ມ, ເອກະສານ ອຸປະກອນ ແລະທຳລາຍປື້ມເຊັ່ນ: ລັກຕັດ ຫຼື ຈີກເອົາຮູບພາບ, ເນື້ອໃນ, ສູດຄິດໄລ່ຕ່າງໆຜູ້ນັ້ນຈະຖືກໄລ່ອອກຈາກການເປັນສະມາຊິກຫໍສະໝຸດທັນທີ່ ພ້ອມດ້ວຍການປັບໄໝເປັນຈຳນວນເງິນ 3 ເທົ່າຂອງລາຄາປື້ມດັ່ງກ່າວ ແລະ ຈະນຳສະເໜີຕໍ່ຄະນະຮັບຜິດຊອບ ເພື່ອພິຈາລະນາໂທດຕາມສົມຄວນ

ມາດຕາ 11 ວ່າດ້ວຍການເປີດບໍລິການ ການຢືມ - ການສົ່ງປື້ມ

• ຕອນເຊົ້າ ວັນຈັນ - ວັນສຸກ 8:15 -12 :00

• ຕອນບາຍ ວັນຈັນ -ວັນສຸກ 1:00 – 5:00

 

[1]  ຫໍສະໜຸດຄົ້ນຄ້ວາໃນປັດຈຸບັນ ປະກອບດ້ວຍປຶ້ມຕໍາລາ, ເອກະສານວິຊາການຕ່າງໆ ເປັນຈໍານວນທັງໝົດ 5 000 ກ່ວາເຫຼັ້ມ